ក

ចូឡធាតុបច្ចយជោតិកា

កទន្តិ មជ្ជន្តិ ឯត្ថាតិ កោ កាយោ, កទ មាទេ, ក្វិ. ធាត្វន្តលោបោ. កញ្ចតិ ទិព្វតីតិ កោ ព្រហ្មា, កចិ ជុតេ, ក្វិ, ធាត្វន្តលោបោ. កជ្ជតិ បីឡេតីតិ កោ វាតោ, កជ្ជ បីឡនេ, ក្វិ, ជ្ជលោបោ. កដតិ ឧបរិភាវំ គច្ឆតីតិ កំ សីសំ, កដ គតិយំ, ក្វិ, ដលោបោ. សុខំ ករោតិ ឧប្បាទេតីតិ កំ ជលំ, ករ ករណេ, អ, រលោបោ. សទ្ទំ ករោតីតិ កំ អម្ពុ, ករ ករណេ, ក្វិ. កក្ខតិ ហសតិ ឯតេនាតិ កំ សុខំ, កក្ខ ហាសេ, ក្វិ, ក្ខលោបោ. កសទ្ទោ កាយព្រហ្មវាតសីសជលសុខាទ្យត្ថវាចកោ ហោតិ. វុត្តញ្ហិ សទ្ទនីតិធាតុមាយាយំ កាយេ ព្រហ្មនិ វាតេ ច, សីសេ ជលសុខេសុ ច កសទ្ទោ វត្តតី តីសុ, បុមា តីសុ នបុំសកោតិ.