កច្ច

ចូឡធាតុបច្ចយជោតិកា

ឥស្សរិយា វា សម្បត្តិយា វា កច្ចតិ ទិព្វតីតិ កច្ចោ អភិរូបោ, កច ទិព្វនេ, អ. រូបសម្បត្តិយា កច្ចេតិ ទិព្វតិ វិរោចតីតិ កច្ចោ ឯវំនាមកោ អាទិបុរិសោ, កច ទិត្តិយំ, អ, ទ្វិត្តំ. កន្តិត្ថាតិ កច្ច, កតិ ឆេទនេ, ត្វា, ត្វាបច្ចយស្ស ច្ចោ, អថ វា ត្វាស្ស ប្យោ, តស្ស ចោ, យស្ស បុព្វរូបត្តំ. ករិត្វានាតិ កច្ច, ករ ករណេ, ត្វាបច្ចយោ, បទរូបសិទ្ធិយំ ចនន្តេហិ រច្ចន្តិ យោគវិភាគេន តុនាទីនំ រច្ចាទេសោ, ធាត្វន្ត- លោបោ. ឯវំ វិកច្ច, វិបុព្វោយំ. អធិកច្ច, អធិបុព្វោយំ. សទ្ទនីតិធាតុមាលាយំ វុត្តំ តត្រ កច្ចាតិ កត្វា, អធិកច្ចាតិ អធិកំ កត្វា, អក្ខរចិន្តកា បន សទ្ទសត្ថនយំ និស្សាយ អធិកិច្ច ឥតិ រូបំ ឥច្ឆន្តិ, មយំ បនេតាទិសំ រូបំ បាឡិយា អនុកូលំ ន ហោតីតិ ន ឥច្ឆាម, តថា ហិ ថេរិកាគាថាយំ គោតមិយា បរិនិព្វានវចនេ បទក្ខិណំ កច្ច និបច្ច បាទេតិ បាឡិ ទិស្សតិ, តត្ថ ហិ បទក្ខិណំ កត្វាតិ អត្ថោ, កច្ចាតិ បទស្ស ទស្សនេន អធិកច្ចាតិ បទម្បិ ទិដ្ឋមេវ ហោតិ, ឯស នយោ អញ្ញត្រាបិ យថារហំ វេទិតព្វោ.