កថិន

ចូឡធាតុបច្ចយជោតិកា

កឋិតិ ពទ្ធតីតិ កថិនំ, កឋិ កិច្ឆជីវនេ, ឥនោ, ថោ ឋស្ស. កថតីតិ កថិនំ, កថ ថទ្ធេ ថេរិយេ ច, ក្តបច្ចយោ, តការស្ស នោ, ឦអាគមោ, រស្សោ ច. បញ្ចានិសំសេ អញ្ញត្ថ គន្តុំ អទត្វា សង្គណ្ហាតីតិ កថិនំ, កថ សង្គហណេ, ឥន សព្វត្ថាតិ យោគវិភាគេន វា, សុបតោ ចាតិ ឯត្ថ ចសទ្ទេន វា ឥនបច្ចយោ. កឋិតិ កិច្ចេន ជីវតីតិ កថិនោ រុក្ខោ, តស្ស ឯសោតិ កថិនោ ថិរភាវោ, សោ ឯតស្ស អត្ថីតិ កថិនំ, កឋិ កិច្ឆជីវនេ, ឥនោ, ណោ. បញ្ញត្តិជាតំ ឋិការស្ស ថការំ កត្វា កថិនន្តិ វុត្តំ, កថីយតេ សីលាឃតេ បសំសីយតេ ពុទ្ធាទីហីតិ កថិនំ, កត្ថ សិលាឃាយំ, ឥនោ, សសំយោគត្ថការំ និសំយោគំ កត្វា សិជ្ឈតិ, ពហូ បន បណ្ឌិតា ឥមំ បាឋំយេវ គហេត្វា កឋិនសទ្ទោ មុទ្ធជទុតិយន្តោយេវ ហោតិ, ន ទន្តជោតិ វទន្តិ ចេវ លិខន្តិ ច, ន បនេវំ ឯកន្តតោ វត្តព្វំ, កស្មា? អភិធានប្បទីបិកាដីកាយំ កក្ខឡបរិយាយំ គុណសទ្ទភូតំ កឋិនសទ្ទំ សន្ធាយ វុត្តំ, ន សាសនវោហារតោ នាមសទ្ទភូតំ, តេនេវាហ បញ្ចកំ កក្ខឡេតិ, អនេកេសុ បន បាឡិអដ្ឋកថាទិ- បោត្ថកេសុ ជិនសាសនវោហារតោ នាមសទ្ទភូតោ កថិនសទ្ទោ ទន្តជោយេវ យេភុយ្យេន បញ្ញាយតិ, តេនេវ ច ការណេន អភិធានប្បទីបិកាដីកាយម្បិ វណ្ណវិបរិយាយេ កថិនន្តិបិ វុត្តំ, អាចរិយា បន កឋធាតុ ឥនបច្ចយោតិ វិកប្បេត្វា កឋ សមត្ថនេតិ អត្ថំ វទន្តិ, តំដីកាសុ ថិរន្តិ អត្ថោតិ វចនំ អនបេក្ខិត្វា បញ្ចានិសំសេ អន្តោករណសមត្ថតាយាតិ ហេតុមេវ អត្ថភាវេន គហេត្វា វុត្តំ សិយា, តំ បន ថិរភាវស្ស ហេតុយេវ, កថំ វិគ្គហោ កាតព្វោតិ? អយំ កថិនសទ្ទោ ចតូសុ បទេសុ នាមបទំ, បញ្ចសុ នាមេសុ សុទ្ធនាមំ, ចតូសុ សុទ្ធនាមេសុ រុឡ្ហីសុទ្ធនាមំ, ទ្វីសុ បាដិបទិកសទ្ទេសុ អនិប្ផន្នបាដិបទិកសទ្ទោ, តស្មា ន កាតព្វោ, វុត្តញ្ហិ សទ្ទវិទូហិ រុឡ្ហីខ្យាតំ និបាតញ្ចុ-, បសគ្គាលបនំ តថា សព្វនាមិកមេតេសុ, ន កតោ វិគ្គហោ ឆសូតិ. អបរេ បនាហុ រុឡ្ហីខ្យាតំ និបាតញ្ចុ-, បសគ្គាលបនំ តថា ឥមេសុ បញ្ចសទ្ទេសុ, វិគ្គហោ ន កតោ សទាតិ ច. កេចិ អាចរិយា បនាហុ រុឡ្ហីខ្យាតំ និបាតញ្ចុ-, បសគ្គា សព្វនាមិកំ ឥមេសុ បញ្ចសទ្ទេសុ, វិគ្គហោ ន កតោ សទាតិ ច. ទុតិយគាថាការមតេន សព្វនាមស្ស វិគ្គហោ កតោ. តតិយគាថាការមតេន អាលបនស្ស វិគ្គហោ កតោ. អយមត្ថោ វិនយាលង្ការដីកាយំ វុត្តោ, តត្ថ វិត្ថារត្ថិកេហិ ឱលោកេតព្វោ.