កម៑
សទ្ទានុក្រមបាលីខ្មែរ
បទវិក្ខេបេ កមតិ ចង្កមតិ "ឈានទៅ, ដើរទៅ, បោះជំហានទៅ, ចូលទៅ" ភូ. ។ ការិត. និក្កាមេតិ ។ អា. នាស្ស កាយេ អគ្គិ វា វិសំ វា សត្ថំ វា កមតិ "ភ្លើងក្ដី ថ្នាំពិសពុលក្ដី សស្រ្តាវុធក្ដី មិនចូលទៅក្នុងរូបកាយនៃបុគ្គលមានមេត្តាចិត្តនោះទេ"-ស. ។ អតិក្កមតិ "កន្លង, ប្រព្រឹត្តកន្លង, ល្មើស" ន. អតិក្កមោ (អតិ+កម៑) ។ អភិក្កមតិ "ឈានទៅមុខ, កន្លងទៅមុខ, រុកទៅមុខ, ចំរើនឡើង (ជម្ងឺ) " ន. អភិក្កមោ (អភិ+កម៑) ។ បដិក្កមតិ "ត្រឡប់ក្រោយ, ថយក្រោយ, ស្រាកស្រាន្ត (ជំងឺ) " ន. បដិក្កមោ (បដិ+កម៑) ។ បក្កមតិ "ជៀសចេញ, ថយចេញ, ងាកចេញ, ដើរចេញទៅ" កិ. គុ. បក្កន្ដោ (ប+កម៑+គ) បក្កមន្តោ (ប+កម៑+អន្ត) ។ បរក្កមតិ "ប្រឹងប្រែង, ខិតខំ, ព្យាយាម" ន. បរក្កមោ (បរ+កម៑) ។ វិក្កមតិ "ឈានទៅយ៉ាងសង្ហា, ដើរទៅយ៉ាងអង់អាច" ន. វិក្កមោ (វិ+កម៑) ។ អភិនិក្កមតិ ឬ អភិនិក្ខមតិ "ចេញទៅក្រៃលែង, ចេញចាកកាម, ចេញបួស" ន. អកិនិក្ខមោ អភិនិក្ខមនំ (អកិ+និ+កម៑) ។ សង្កមតិ "ទៅព្រម, ទៅដោយប្រពៃ..." ន. សង្កន្តិ សង្កមោ (សំ+កម) ។ ឧបសង្កមតិ "ចូលទៅ, ចូលទៅរក, ចូលទៅគាល់, ចូលទៅជួប" ន. ឧបសង្កមនំ (ឧប+សំ+កម៑) ។
សទ្ទានុក្រមបាលីខ្មែរ
ឥច្ឆាកន្តីសុ កាមេតិ កាមយតិ "ប្រាថ្នា, ចង់បាន, ស្រឡាញ់" ចុ. ។ រូបដទៃ កន្តិ និកន្តិ កាមនា កាមយមានោ កាមេន្តោ ។ កាមោ បុំ. មានពីរយ៉ាងគឺ កិលេសកាមោ បានដល់ តណ្ហា រាគៈ ជាដើមមួយ, វត្ថុកាមោ បានដល់ រូបសំឡេង ក្លិន រស សម្ផស្ស មួយ ។ អភិក្កនំ្ត គុ. ប្រែបានច្រើន៖ ១/ កន្លងហួសទៅ, អស់ទៅ =ខយោ ឧ. អភិក្កន្តា ភន្តេ រត្តិ "រាត្រីកន្លងផុតហើយ ព្រះអង្គ (ភ្លឺស្វាង)" ។ ២/ ល្អ, ស្អាត, ឆើតឆាយ =សុន្ទរោ ឧ. អយំ ឥមេសំ ចតុន្នំ បុគ្គលានំ អភិក្កន្តតរោ ច បណីតតរោ ច "បុគ្គលនេះល្អឆើតឆាយ ទាំងប្រណិតជាងបុគ្គលទាំង ៤ នាក់នេះ" ។ ៣/ ល្អ, ផូរផង់ =អភិរូបោ ឧ. អភិក្កន្តេន វណ្ណេន សព្វា ឱភាសយំ ទិសា "មានពណ៌ល្អផូរផង់ ញ៉ាំង ទិសទ. ទាំងអស់ឲ្យភ្លឺច្រាល" (ឱ+ភាស+ណយ+អន្ត+សិ) ។ ៤/ ត្រេកអរខ្លាំង ត្រេកអរក្រៃពេក, ពិរោះ =អព្ភានុមោទនា ឧ. អភិក្កន្តំ ភន្តេ "ព្រះអង្គដ៏ចំរើន សេចក្ដីត្រេកអរក្រៃពេក, ពិរោះពេក"-ស. ។ កន្តា ឥ. "ស្រី, នាង" ដែលប្រុសប្រាថ្នា ឬ ស្រឡាញ់ (កម៑+ត+អា) ។