គោត្រភូ

ចូឡធាតុបច្ចយជោតិកា

ចតុត្ថំ បរិត្តគោត្តស្ស បុថុជ្ជនគោត្តស្ស ច អភិភវនតោ មហគ្គតគោត្តស្ស លោកុត្តរគោត្តស្ស ច ភាវនតោ វឌ្ឍនតោ គោត្រភុ ចិត្តំ ញាណំ វា, គោត្រសទ្ទូបបទ - ភូ សត្តាយំ, ក្វិ. គោត្រភូតិ បញ្ញត្តារម្មណំ មហគ្គតារម្មណំ វា គោត្តភុចិត្តំ. តញ្ហិ កាមាវចរគោត្តមភិភវតិ, មហគ្គតគោត្តញ្ច ភាវេតិ និព្វត្តេតីតិ គោត្រភូតិ វុច្ចតិ. អបិច គោត្រភូតិ និព្វានារម្មណំ មគ្គវីថិយំ បវត្តំ គោត្រភុញាណំ វា សង្ខារារម្មណំ វា ផលសមាបត្តិវីថិយំ បវត្តំ គោត្រភុញាណំ. តេសុ ហិ បឋមំ បុថុជ្ជនគោត្តមភិភវតិ, អរិយគោត្តញ្ច ភាវេតិ. គោត្តាភិធានា ច និព្វានតោ អារម្មណ- ករណវសេន ភវតីតិ គោត្រភូតិ វុច្ចតិ, ទុតិយំ បន សង្ខារម្មណម្បិ សមានំ អាសេវនបច្ចយភាវេន សសម្បយុត្តានិ ផលចិត្តានិ គោត្តាភិធានេ និព្វានម្ហិ ភាវេតីតិ គោត្រភូតិ វុច្ចតិ. គោត្តំ ភវតិ អភិភវតីតិ គោត្រភុ, គោត្តសទ្ទូបបទ - ភូ អភិភវនេ, ក្វិ, ត្រោ ត្តស្ស. គោត្តំ ភវតិ បាបុណាតីតិ គោត្រភុ, គោត្ត- សទ្ទូបបទ - ភូ បាបុណនេ, ក្វិ, នបុំសកត្តា រស្សត្តំ, សិលោបោ. គោត្តសង្ខាតំ អមតមហានិព្វានំ អារម្មណំ កត្វា ភូតោតិ គោត្រភូ, សោតាបត្តិមគ្គស្ស អនន្តរបច្ចយេន សិខាប្បត្តពលវ- វិបស្សនាចិត្តេន សមន្នាគតោ បុគ្គលោ, វុត្តញ្ហេតំ ភគវតា កតមោ ច បុគ្គលោ គោត្រភូ? យេសំ ធម្មានំ សមន្តរា អរិយធម្មស្ស អវក្កន្តិ ហោតិ, តេហិ ធម្មេហិ សមន្នាគតោ បុគ្គលោ គោត្រភូតិ ឥទមេវេត្ថ អត្ថសាធកំ វចនំ. អបិច សមណោតិ គោត្តមត្តមនុភវមានោ កាសាវកណ្ឋសមណោបិ គោត្រភូ, សោ ហិ សមណោតិ គោត្តមត្តំ អនុភវតិ វិន្ទតិ, ន សមណធម្មេ អត្តនិ អវិជ្ជមានត្តាតិ គោត្រភូតិ វុច្ចតិ, ភិក្ខុគោត្តស្ស អភិភវនតោ វិនាសនតោ គោត្រភុនោ. អថ វា គោត្តំ វុច្ចតិ សាធារណំ នាមំ, មត្តសទ្ទោ លុត្តនិទ្ទិដ្ឋោ, តស្មា សមណាតិ គោត្តមត្តំ អនុភវន្តិ ធារេន្តីតិ គោត្រភុនោ, នាមមត្តសមណាតិ អត្ថោ, ភវិស្សន្តិ ខោ បនានន្ទ អនាគតមទ្ធានំ គោត្រភុនោ កាសាវកណ្ឋា ទុស្សីលា បាបធម្មាតិ ឥទមេតស្ស អត្ថស្ស សាធកំ វចនំ. អយំ បន សទ្ទោ ឩការន្តោ បុល្លិង្គោ.