ទិដ្ឋិគត

ចូឡធាតុបច្ចយជោតិកា

ទិដ្ឋិយេវ ទិដ្ឋិគតំ, និរុត្តិទីបនិយំ មហាវុត្តិនា គតសទ្ទោ អាគមោ ហោតិ, អភិធម្មត្ថវិភាវិនីអត្ថយោជនាយំ វុត្តំ យាគមោ សុឧច្ចារណត្ថំ បក្ខិត្តោ. ឯវសទ្ទោ គតសទ្ទស្ស វិសុំ អត្ថំ និវត្តេតិ. ទិដ្ឋិយេវ ទិដ្ឋិគតំ, បរិកប្បតទ្ធិតវិគ្គហោ, ន កម្មធារយោ. យទនុបបន្នា និបាតនា សិជ្ឈន្តីតិ សុត្តេន ទិដ្ឋិសទ្ទតោ បរស្មិំ គតសទ្ទោ វាចាសិលិដ្ឋត្ថំ និបតតិ. សទ្ទនីតិយំ ហិ វាចាសិលិដ្ឋត្ថំ អន្តគតាទីនិ បតន្តិ បរន្តេ សុត្តន្តោ, កម្មន្តោ. វនន្តំ, ព្រហ្មជាលសុត្តន្តំ, គូថគតំ, មុត្តគតំ, ទិសតា, ទេវតា, ឥទប្បច្ចយតាតិ អគ្គវំសាចរិយេន វុត្តន្តិ. មណិសារមញ្ជូសាយម្បន វុត្តំ សង្ខារគតំ ថាមគតន្តិអាទីសុ គតសទ្ទោ តព្ភាវវត្តិ វិយ ឥធ គតសទ្ទស្ស តព្ភាវវុត្តិត្តា ទិដ្ឋិយេវ ទិដ្ឋិគតំ នាម, ន ទិដ្ឋិតោ អញ្ញំ កិញ្ចិ ធម្មជាតន្តិ យោជនា. យថា ទានមេវ ទានមយន្តិ ឥទំ សកត្ថវុត្តិតទ្ធិតំ នាម ហោតិ, ឯវំ ទិដ្ឋិយេវ ទិដ្ឋិគតន្តិ អយម្បិ តុល្យាធិករណត្តា តព្ភាវវុត្តិកម្មធារយសមាសោ នាមាតិ ទិដ្ឋព្វោ. អាទិសទ្ទេន គូថគតំ មុត្តគតន្តិអាទីនិ សង្គណ្ហាតិ. តស្ស ទិដ្ឋិសទ្ទស្ស ភាវោ អត្ថោ តព្ភាវោ, ភាវសទ្ទោ ហិ បទត្ថេ បវត្តតិ. វុត្តញ្ហិ ភាវោ បទត្ថេ សត្តាយន្តិ តស្មិំ វុត្តិ បវត្តិ យស្សាតិ តព្ភាវវុត្តិ. គតសទ្ទោ ទិដ្ឋិសទ្ទស្ស ទិដ្ឋិភូតេ អត្ថេ បវត្តោតិ អត្ថោតិ. ទិដ្ឋីសុ គតំ ទិដ្ឋិគតំ, តប្បរិសសមាសោយំ.