ធោន

ចូឡធាតុបច្ចយជោតិកា

អហិតេ ធម្មេ ធុនាតីតិ ធោនោ, ធូ និទ្ធូននេ, ក្តោ, តស្ស នោ, ឩស្សោ. សទ្ទនីតិធាតុមាលាយំ ធោនា អស្ស អត្ថីតិ ធោនោតិ និព្វចនំ កតំ, ធោនស្ស ហិ នត្ថិ កុហិញ្ចិ លោកេ, បកប្បិតា ទិដ្ឋិ ភវាភវេសូតិ អយមេត្ថ បាឡិ និទស្សនំ, ធាតូនមនេកត្ថតាយ ធូធាតុ កម្បនត្ថេបិ ធោវនត្ថេបិ វត្តតិ. ធោនាតិ បញ្ញា, វុត្តញ្ហេតំ និទ្ទេសេ ធោនា វុច្ចតិ បញ្ញា, យា បញ្ញា បជាននា សម្មាទិដ្ឋិ, កិំការណា ធោនាតិ វុច្ចតិ បញ្ញា? យំ តាយ បញ្ញាយ កាយទុច្ចរិតំ ធុតញ្ច ធោតញ្ច សន្ធោតញ្ច និទ្ធោតញ្ច, វចីទុច្ចរិតំ មនោទុច្ចរិតំ ធុតញ្ច ធោតញ្ច សន្ធោតញ្ច និទ្ធោតញ្ច, តំការណា ធោនា វុច្ចតិ បញ្ញា, អថ វា សម្មាទិដ្ឋិ មិច្ឆាទិដ្ឋិំ ធុតា ច ធោតា ច សន្ធោតា ច និទ្ធោតា ច, តំការណា ធោនា វុច្ចតិ បញ្ញាតិ.