និយ្យានិក

ចូឡធាតុបច្ចយជោតិកា

និសេសតោ សកលំ សំសារវដ្ដំ យាតីតិ និយ្យានិកោ, និបុព្វ - យា បាបនេ, យុ, ណិកោ. និយ្យាតិ ឯតេនាតិ និយ្យានំ, និយ្យានមេវ និយ្យានិកំ, និបុព្វ - យា បាបុណនេ, យុ, សកត្ថេ ណិកោ. ទុគ្គតិតោ សំសារតោ ច និយ្យាតិ ឯតេនាតិ និយ្យានំ, សគ្គមគ្គោ មោក្ខមគ្គោ ច. តំ និយ្យានំ អរហតិ, និយ្យានេ វា និយុត្តា, និយ្យានំ វា ផលភូតំ ឯតិស្សា អត្ថីតិ និយ្យានិកា, តទ្ធិតេ ណិកោ. វចីទុច្ចរិតសំកិលេសតោ និយ្យាតីតិ វា ឦការស្ស រស្សត្តំ, យការស្ស ច កការំ កត្វា និយ្យានិកា, ចេតនាយ សទ្ធិំ សម្ផប្បលាបា វេរមណិ. អថ វា វិនយដ្ឋកថាយ អត្ថយោជនាយំ យា សម្មាទិដ្ឋិ វដ្ដទុក្ខតោ និយ្យាតិ និស្សរតិ ឥតិ តស្មា សា សម្មាទិដ្ឋិ និយ្យានិកា នាម, អនីយប្បច្ចយោ កត្តុវាចកោ, យស្ស កោតិ វុត្តំ. បទរូបសិទ្ធិយំ តព្វានីយាតិ យោគវិភាគេន [អនីយបច្ចយោ] កត្តុករណេសុបិ, យា បាបុណនេ, និយ្យាតីតិ និយ្យានីកោ មគ្គោតិ វុត្តំ. និរុត្តិទីបនិយំ និយ្យន្តិ ឯតេនាតិ និយ្យានីយោ, សោឯវ និយ្យានិកោ, យស្ស កោ, រស្សោតិ វុត្តំ. សទ្ទនីតិយម្បន និយ្យាតីតិ នីយានិយោ, សោឯវ នីការគតស្ស ឦការស្ស រស្សត្តំ, យការស្ស ច ទ្វិត្តំ កត្វា ទុតិយស្ស បន យការស្ស កការំ កត្វា និយ្យានិកោតិ ភវតិ, នីយាតោ យុស្មា ណិយោតិ នីបុព្វាយ យាធាតុយា យោ យុបច្ចយោ បុព្វេ បរោ, តតោ ណិយបច្ចយោ ហោតីតិ វុត្តំ. នីយន្តិ និទ្ធរន្តីតិ និយ្យានិកា, ចត្តារោ អរិយមគ្គា.