នេវសញ្ញានាសញ្ញាយតន

ចូឡធាតុបច្ចយជោតិកា

ឱឡារិកសញ្ញាយ អភាវតោ សុខុមាយ ច សញ្ញាយ ភាវតោ នេវស្ស សសម្បយុត្តធម្មស្ស ឈានស្ស សញ្ញា ន អសញ្ញាតិ នេវសញ្ញានាសញ្ញំ, នេវសញ្ញានាសញ្ញន្តិ វត្តព្វេ មជ្ឈេ អស្សាត្តំ កត្វា ឯវំ វុត្តំ. នេវសញ្ញញ្ច តំ នាសញ្ញញ្ចាតិ នេវសញ្ញានាសញ្ញំ, លហុកនយោយំ. នេវស្ស សញ្ញា អត្ថីតិ នេវសញ្ញំ, នាស្ស សញ្ញា អត្ថីតិ អសញ្ញំ, ន អសញ្ញំ នាសញ្ញំ, នេវសញ្ញញ្ច តំ នាសញ្ញញ្ចេតិ នេវសញ្ញានាសញ្ញំ, គរុកនយោយំ, នេវស្សាតិ ឯត្ថ នការត្ថោ នេវសទ្ទោ អភាវត្ថោ, នាសញ្ញន្តិ ឯត្ថ នការោ អញ្ញត្ថោ, អការោ អភាវត្ថោវ. អថ វា យាយមេត្ថ សញ្ញា សា បដុសញ្ញាកិច្ចំ កាតុំ អសមត្ថតាយ នេវសញ្ញា, សង្ខារាវសេសសុខុមភាវេន វិជ្ជមានត្តា នាសញ្ញាតិ នេវសញ្ញានាសញ្ញា, កិមិវ, ឧណោ្ហទកេ សុខុមា តេជោធាតុវ, នេវសញ្ញានាសញ្ញា ច សា សេសសម្បយុត្តធម្មានំ អធិដ្ឋានដ្ឋេន អាយតនញ្ចាតិ នេវសញ្ញានាសញ្ញាយតនំ, លហុកនយោយំ. នេវ សញ្ញាតិ នេវសញ្ញា, ន អសញ្ញាតិ នាសញ្ញា, នេវសញ្ញា ច សា នាសញ្ញា ចាតិ នេវសញ្ញានាសញ្ញា, នេវសញ្ញានាសញ្ញាយេវ អាយតនន្តិ នេវសញ្ញានាសញ្ញាយតនំ, នេវសញ្ញានាសញ្ញា ច សា អាយតនញ្ចាតិ វា នេវសញ្ញា- នាសញ្ញាយតនំ, ឈានំ, គរុកនយោយំ.