បាតព្យ

ចូឡធាតុបច្ចយជោតិកា

យថាកាមំ បាតិ បរិភុញ្ជតីតិ បាតព្យោ, បា បរិភុញ្ជនេ, កត្តរិ ច តព្យោ យថាតន្តិ សទ្ទនីតិសុត្តេន តព្យោ. បាតព្វន្តិ បាតព្យំ, បា រក្ខណេ, ណ្យោ ចាតិ សុត្តេ ចសទ្ទេន តព្យោ, បាតព្យស្ស ភាវោ បាតព្យតា, ឆេទនភេទាទីហិ យថារុចិ បរិភុញ្ជិតព្វតាតិ អត្ថោ, ភូតគាមបាតព្វតាយ បាចិត្តិយន្តិ យថា. មណិសារមញ្ជូសាដីកាយំ បិយន្តិ បរិភុញ្ជិយន្តិ អនុភូយន្តីតិ បាតព្វា, កាមា. បិវន្តិ វា បរិភុញ្ជន្តិ អនុភវន្តីតិ បាតព្វា, សត្តា. និរុត្តិនយេន បាតព្យាតិ វុត្តំ. បរិភោគវសេន វា តេសុ បតន្តិ បតន្តា វិយ ហោន្តីតិ បាតព្យា, សត្តា. តេសំ ភាវោ បាតព្យតា, បរិភុញ្ជិតព្វភាវោ, បរិភុញ្ជកភាវោ វា, បរិភុញ្ជនន្តិ វុត្តំ ហោតិ. បតន្តភាវោ វា, បរិភោគវសេន បតនន្តិ វុត្តំ ហោតីតិ វចនត្ថំ ទស្សេតិ.