បាតិមោក្ខ

ចូឡធាតុបច្ចយជោតិកា

បាតិំ បុគ្គលំ ទុក្ខេហិ មោក្ខតិ មោចយតីតិ បាតិមោក្ខំ, មុច មោចនេ, អ, ចស្ស ខោ, មោក្ខ មោចនេ វា. ស្យាមបោដ្ឋកេ បាដិមោក្ខន្តិ ទិស្សតិ, ន យុជ្ជតិ, អភិធម្មត្ថវិភាវិនិយំ យោ នំ បាតិ រក្ខតិ តំ បាតិំ មោក្ខេតិ អបាយាទីហិ ទុក្ខេហីតិ បាដិមោក្ខន្តិ វុត្តំ, តស្ស ដោ. អបរោ នយោ ធម្មបទមហាដីកាយំ វុត្តោ កិលេសានំ ពលវភាវតោ បាបកិរិយាយ សុករាភាវតោ បុញ្ញាកិរិយាយ ច ទុក្ករភាវតោ ពហុក្ខត្តុំ អបាយេសុ បតនសីលោតិ បាតិ បុថុជ្ជនោ. អនិច្ចតាយ វា ភវាទីសុ កម្មវេគុក្ខិត្តតោ ឃដិយន្តំ វិយ អនវដ្ឋានេន បរិព្ភមន្តោ គមនសីលោតិ បាតិ. មរណវសេន វា តម្ហិ តម្ហិ សត្តនិកាយេ អត្តភាវស្ស បតនសីលោតិ បាតិ. សត្តសន្តានោ ចិត្តមេវ វា. តំ បាតិំ សំសារ- ទុក្ខតោ មោក្ខេតីតិ បាតិមោក្ខំ. ចិត្តស្ស ហិ វិមោក្ខេន សត្តោ វិមុត្តោតិ វុច្ចតិ. វុត្តំ ហិ ចិត្តវោទានា វិសុជ្ឈតីតិ ច អនុបាទាយ អាសវេហិ ចិត្តំ វិមុត្តន្តិ ច. អថវា អវិជ្ជាទិហេតុនា សំសារេ បបតិ គច្ឆតិ បវត្តតីតិ បាតិ, អវិជ្ជានីវរណានំ សត្តានំ តណ្ហាសំយោជនានំ សន្ធាវតំ សំសរន្តីតិ វុត្តំ, តស្ស បាណិនោ សត្តស្ស តណ្ហាសំកិលេសត្តយតោ មោក្ខោ ឯតេនាតិ បាតិមោក្ខោ. កណ្ឋេកាលោតិ អាទីនំ វិយ សមាសសិទ្ធំ វេទិតព្វា. អថវា បាតេតិ វិនិបាតេតិ ទុក្ខេហីតិ បាតិ ចិត្តំ. វុត្តំ ហិ ចិត្តេន និយ្យតេ លោកោ, ចិត្តេន បរិកស្សតីតិ, តស្ស បាតិនោ មោក្ខោ ឯតេនាតិ បាតិមោក្ខោ. បតតិ វា ឯតេន អបាយទុក្ខេ សំសារ- ទុក្ខេ ចាតិ បាតិ តណ្ហាទិសំកិលេសា, វុត្តំ ហិ តណ្ហា ជនេតិ បុរិសំ, តណ្ហាទុតិយោ បុរិសោ ច អាទិ, តតោ បាតិតោ មោក្ខោតិ បាតិមោក្ខោតិ. អយមេត្ថ សង្ខេបោ, វិត្ថារោ តុ តតោ គហេតព្វោ, តទត្ថទស្សនត្ថញ្ច វិត្ថារនយេ អាហរិយមានេ អតិប្បបញ្ចោ សិយាតិ មយម្បិ តំ ន វិត្ថារេស្សាម.