រោទិស្សន្តុ

ចូឡធាតុបច្ចយជោតិកា

រោទិស្សតីតិ រោទិស្សន្តោ, រុទ អស្សុវិមោចនេ, ស្សន្តុ, ឥការាគមោ, ឧស្សោ. សកម្មិកវសេនិមិស្សា ធាតុយា អត្ថោ គហេតព្វោ, តត្រាយំ បាឡិ នាហំ ភន្តេ ឯតំ រោទាមិ, យំ មំ ភន្តេ ភគវា ឯវមាហាតិ, អយំ បនេត្ថ អត្ថោ, យំ មំ ភន្តេ ភគវា ឯវមាហ, អហំ ឯតំ ភគវតោ ព្យាករណំ ន រោទាមិ ន បរិទេវាមិ ន អនុត្ថុនាមីតិ ឯវំ សកម្មិកវសេនត្ថោ វេទិតព្វោ, ន អស្សុមុញ្ចនមត្តេន មតំ វា អម្ម រោទន្តិ, យោ វា ជីវំ ន ទិស្សតិ ជីវន្តំ អម្ម បស្សន្តិ, កស្មា មំ អម្ម រោទសីតិ អយញ្ចេត្ថ បយោគោតិ ឥទមដ្ឋកថាវចនំ. ឥទំ បន ដីកាវចនំ, យថា សកម្មកា ធាតុសទ្ទា អត្ថវិសេសវសេន អកម្មកា ហោន្តិ វិពុទ្ធោ បុរិសោ វិពុទ្ធោ កមលសណ្ឌោតិ, ឯវំ អត្ថវិសេសវសេន អកម្មកាបិ សកម្មកា ហោន្តីតិ ទស្សេតុំ ន បរិទេវាមិ ន អនុត្ថុនាមីតិ អាហ, អនុត្ថនសទ្ទោ សាម្មកវសេន បយុជ្ជតិ បុរាណានិ អនុត្ថនន្តិអាទីសុ, អយញ្ចេត្ថ បយោគោតិ ឥមាយ គាថាយ អនុត្ថុននំ រុទនំ អធិប្បេតន្តិ ទស្សេតីតិ.