អការ
ធាតុបច្ចយទីបនី(ភូមា)
អឯវ ការោ អការោ၊ សកត្ថេ ការបច្ចយោ။
ចូឡធាតុបច្ចយជោតិកា
អ ឯវ អការោ, ការបច្ចយោ សកត្ថេ ហោតិ សកត្ថវុត្តិតទ្ធិតត្តា ទេវោ ឯវ ទេវតាតិអាទីសុ វិយ. ឯវំ អា ឯវ អាការោ, យ ឯវ យការោ. ការបច្ចយោ អក្ខរវាចកោ, អក្ខរេហិ ការឥតិមិនា បទរូបសិទធិយំ តំ ទស្សេតិ. អបរោ នយោ– អ ច សោ ការោ ចាតិ អការោ, ឥធ បន ការោ សទ្ទវាចកោ, ន ការបច្ចយោ វណ្ណវាចកោ. វត្តុនោ ហិ អធិប្បាយន្តរេន អក្ខរតោ ការបច្ចយោ ន ហោតិ កទាចិ. ករណំ ការោ, អឥតិ ការោ អការោ, អឥតិ ឧច្ចារណំ, អសទ្ទោតិ អត្ថោ. កការោតិអាទីសុបិ ឯសេវ នយោ. ឧបរិ ឯវការគ្គហណេន សំសន្ទេតព្វំ. ឯត្ថ ច អការោ វុឌ្ឍិយំ, តព្ភាវេ, សទិសេ, និសេធេ, អញ្ញេ, អប្បកេ, អសង្ខាតេ វិស្ណុម្ហិ [សក្កតេ វិស្ណុ, បាឡិយំ វិណ្ហុ], និន្ទាយំ, វិរុទ្ធេ, វិរហេ, សុញ្ញេ, បទបូរណេ ចាតិ អត្ថេសុ វត្តតិ. តេន វុត្តំ សទ្ទនីតិសុត្តមាលាយំ បដិសេធេ វុទ្ធិតព្ភាវេ, អញ្ញត្ថេ សទិសេបិ ច វិរុទ្ធេ គរហេ សុញ្ញេ, អការោ វិរហប្បកេតិ. វិត្ថារោ តតោ គហេតព្វោ.