អង្គុត្តរាប

ចូឡធាតុបច្ចយជោតិកា

អង្គា ឯវ សោ ជនបទោ, គង្គាយ បន យា ឧត្តរេន អាបោ, តាសំ អវិទូរត្តា ឧត្តរាបោតិបិ វុច្ចតិ. កតរគង្គាយ ឧត្តរេន យា អាបោតិ, មហាមហីគង្គាយ. តស្សា គង្គាយ ឧត្តរេន យា អាបោ តាសំ អវិទូរត្តា សោ ជនបទោ អង្គុត្តរាបោ វេទិតព្វោ. មហិយា នទិយា អាបោ តស្ស ជនបទស្ស ឧត្តរេន ហោន្តិ, តាសំ អវិទូរត្តា សោ ជនបទោ ឧត្តរាបោ. ឯត្ថ ច អាបសទ្ទស្ស ឯកន្តេន ឥត្ថិលិង្គតា ពហុវចនតា ច អាចរិយេហិ ឥច្ឆិតា. អគ្គវំសាចរិយេន បន អនិត្ថិលិង្គតា ឥច្ឆិតា, តថា ហិ វុត្តំ សទ្ទនីតិបទមាលាយំ តថា ហិ អង្គុត្តរាបេសុ វិហរតិ អាបណំ នាម អង្គានំ និគមោតិ បាឡិ ទិស្សតិ. តត្ថ ឧត្តរេន មហាមហិយា នទិយា អាបោ យេសំ តេ ឧត្តរាបា, អង្គា ច តេ ឧត្តរាបា ចាតិ អង្គុត្តរាបាតិ. វិនិច្ឆយោ តត្ថ ឱលោកេតព្វោ. វជ្ឈំ នាម តិរច្ឆានបព្វតំ បហរិត្វា បញ្ចធារា ហុត្វា បវត្តដ្ឋានេ បន គង្គា យមុនា អចិរវតី សរភូ មហីតិ បញ្ចធា សង្ខំ គតា, ឯវមេតា បញ្ច មហានទិយោ ហិមវន្តតោ បភវន្តិ. តាសុ យា អយំ បញ្ចមី មហី នាម, សា ឥធ មហាមហីតិ អធិប្បេតា.