អជ

ចូឡធាតុបច្ចយជោតិកា

អជតិ គច្ឆតីតិ អជោ ឆគលកោ, អជ គមនេ, អ. ន ជាយតីតិ អជោ, អជាមិគោ, នបុព្វ - ជន ជននេ, ក្វិ. សទ្ទនីតិធាតុមាលាយំ វុត្តំ អជោតិ ឯឡកោ, ឥមានិ បនស្ស បរិយាយវចនានិ អជោ ឯឡកោ ឧរព្ភោ អវិ មេណ្ឌោតិ, តត្ថ ឧរព្ភោតិ ឯឡកោ, យោ អជោតិបិ វុច្ចតិ, អវីតិ រត្តលោមោ ឯឡកោ, មេណ្ឌោតិ កុដិលសិង្គោ ឯឡកោ, តថា ហិ ជនកជាតកេ អជរថតោ មេណ្ឌរថា វិសុំ វុត្តា, អបិច អជេឡកន្តិ អជតោ ឯឡកស្ស វិសុំ វចនតោ ឯឡកសទ្ទេន មេណ្ឌោបិ គហេតព្វោ, មហោសធជាតកដ្ឋកថាយញ្ហិ មេណ្ឌេឡកានំ និព្វិសេសតា វុត្តាតិ. ឥត្ថិយំ អជា អជី, យថាក្កមំ ថិយំ អា ឦ ច.