អតុល

ចូឡធាតុបច្ចយជោតិកា

តុលាយ សម្មិតោ តុលោ្យ, សោយេវ តុលោតិ វុត្តោ យការលោបវសេន. អថ វា សម្មិតត្ថេ អការបច្ចយវសេន តុលាយ សម្មិតោ តុលោ. ន តុលោ អតុលោ, សីលាទីហិ គុណេហិ កេនចិ អសទិសោ. នត្ថិ ឯតស្ស វា តុលោ សទិសោតិ អតុលោ សទេវកេ លោកេ អគ្គបុគ្គលភាវតោ. មណិសារមញ្ជូសាដីកាយំ វចនត្ថោ កតោ តុលិតព្វោ សម្មិតព្វោ អត្ថោ តុលិយតិ សម្មិយតិ ឯតេនាតិ តុលោ, សទិសោតិបិ អត្ថោ វត្តព្វោ. យស្មា យោ ភគវា សទេវកេ លោកេ អគ្គបុគ្គលភាវតោ តស្មិំ កេនចិ បុគ្គលេន សីលាទីហិ គុណេហិ តុលោ សទិសោ ន ហោតិ, តស្មា សោ ភគវា អតុលោ នាមាតិ វុច្ចតីតិ អត្ថោ, តប្បុរិសកម្មធារយសមាសោយំ. អយញ្ហិ សមាសោ ឧត្តរបទត្ថប្បធានត្តា តប្បុរិសោ ច បទទ្វយស្ស តុល្យាធិករណត្តា កម្មធារយោ ចាតិ វុច្ចតិ, តុលោ សទិសោ ន ហោតីតិ វុត្តោ អសទិសោតិ វុត្តោ ហោតីតិ ន តុលោតិ វាក្យំ អសទិសោតិ សមាសេន វិវរតីតិ ទដ្ឋព្វោ. អយញ្ច អការោ បសជ្ជប្បដិសេធ- វាចិបរិយុទាសវាចិវសេន ទុវិធោ, ឥធ បន បរិយុទាសវាចី អធិប្បេតោ. ទសសុ អការត្ថេសុ ច អញ្ញត្ថេ បវត្តតីតិ ទដ្ឋព្វោ. អថ វា ភគវតោ សទេវកេ លោកេ អគ្គបុគ្គលភាវតោ តេន សីលាទីហិ គុណេហិ តុលោ សទិសោ តស្មិំ កោចិ បុគ្គលោ ឯតស្ស ភគវតោ យស្មា នត្ថិ, ឥតិ តស្មា សោ ភគវា អតុលោ នាមាតិ អត្ថោ, អតគ្គុណសំវិញ្ញាណោយំ ពហុព្វីហិ. សទិសោតិ ឯតេន តុលសទ្ទស្ស សទិសត្ថតំ បាកដំ ករោតិ, អការោ ចេត្ថ វិរហត្ថេ វត្តតីតិ. អភិធម្មត្ថសង្គហ- ទីបនីដីកាយំ បន វចនត្ថោ កតោ តុលាយ សម្មិតោ តុលោ្យ, សម្មិតតទ្ធិតេ ណ្យបច្ចយោ, តុលោ្យយេវ តុលោ, យការលោបោ. តុលាយ សម្មិតោ វា តុលោ, សម្មិតតទ្ធិតេ [យទាទិនា] អបច្ចយោ. អថ វា តុលិយតិ បមិតព្វវត្ថុ បមិយតិ ឯតាយាតិ តុលា, បកតិតុលា, តុលា វិយាតិ តុលា, សព្វញ្ញុតញ្ញាណសង្ខាតា បញ្ញា, ឧបមាតទ្ធិតមិទំ. តុលាយ បញ្ញាយ សម្មិតោតិ តុលោ, សីលាទីហិ គុណេហិ ន តុលោតិ អតុលោ, ឧភេតប្បុរិសសមាសោយំ, សទេវកេ លោកេ អគ្គបុគ្គលភាវតោ នត្ថិ តុលោ ឯតស្សាតិ វា អតុលោ, ចតុត្ថីពហុព្វីហិសមាសោយំ, អសទ្ទោ វិរហត្ថវាចកោតិ. អតុល្យោ អតុលិយោតិបិ បាឋា.