អព្យយីភាវ

ចូឡធាតុបច្ចយជោតិកា

អព្យយានំ អត្ថំ ភាវេតីតិ អព្យយីភាវោ, អព្យយសទ្ទូបបទ - ភូ បកាសនេ, ណេ, ណោ, យទនុបបន្នា និបាតនា សិជ្ឈន្តីតិ ឦអាគមោ, តេសុ វុទ្ធីតិអាទិនា អត្ថសទ្ទលោបោ [មជ្ឈេលោបី]. ព្យយោ វុច្ចតិ វិការោ, នត្ថិ ព្យយោ ឯតស្សាតិ អព្យយោ, អព្យយោ ហុត្វា ភវតីតិ អព្យយីភាវោ, នានាលិង្គវិភត្តិវចនេសុ រូបវិការរហិតោ ហុត្វា ភវតីតិ អត្ថោ, ភូ សត្តាយំ, ណោ, និរុត្តិទីបនិយំ មហាវុត្តិនា ឦអាគមោ. អនព្យយំ អព្យយំ ភវតីតិ អព្យយីភាវោ, អព្វយសទ្ទូបបទ - ភូ សត្តាយំ, ណោ. អព្យយីភាវោតិ ឯត្ថ អភូតតព្ភាវេ ករភូយោគេ សម្បជ្ជមានេ កត្តរី, បច្ចយាទនិដ្ឋា និបាតនា សិជ្ឈន្តីតិ ឦបច្ចយំ កត្វា រូបសិទ្ធិ វេទិតព្វា, តេន ពហុលីកតំ, ពហុលីករោន្តីតិអាទិ សិទ្ធំ ហោតិ, មោគ្គល្លានេ បន អភូតតព្ភាវេ ករាសភូយោគេ វិការា ចីតិ ចីបច្ចយោ ហោតិ.