អភិហដ្ឋុំ

ចូឡធាតុបច្ចយជោតិកា

អភិហរិតុន្តិ អភិហដ្ឋុំ, អភិបុព្វ - ហរ ហរណេ, តុំ, រ្តស្ស ដ្ឋាទេសោ. បទរូបសិទ្ធិយំ តុំបច្ចយស្ស រដ្ឋុំអាទេសោ. និរុត្តិទីបនិយំ បន តុំយានាតិ សុត្តេន ត្វាស្ស តុញ្ច យានញ្ច ហោន្តិ ក្វចិ សមាសេ, អភិហត្តុំ បវារេយ្យ អភិហដុន្តិបិ បាឋោ សំយោគាទិស្ស លោបោ តស្ស ដត្តំ, អភិហដ្ឋុន្តិបិ បាឋន្តិ, ព្យញ្ជនំ ន សមេតីតិ វុត្តំ. សមន្តបាសាទិកាយំ វិនយដ្ឋកថាយំ អភិហដ្ឋុន្តិ អភីតិ ឧបសគ្គោ, ហរិតុន្តិ អត្ថោ, គណ្ហិតុន្តិ វុត្តំ ហោតិ, អថ វា យថា នេក្ខម្មំ ទដ្ឋុ ខេមតោតិ ឯត្ថ ទិស្វាតិ អត្ថោ, ឯវមិធាបិ អភិហដ្ឋុំ បវារេយ្យាតិ អភិហរិត្វា បវារេយ្យាតិ អត្ថោតិ វុត្តំ.