អានាបាន

ចូឡធាតុបច្ចយជោតិកា

អានន្តិ បាណន្ត្យនេន ធម្មជាតេន សត្តាតិ អានំ, ពហិ និក្ខមនវាតោ, អន បាណនេ. បាណនំ សសនំ, វិសរុជបទាទិតោ ណ. អានតោ អបគតំ អបានំ, អន្តោ បវិសនវាតោ. អានញ្ច អបានញ្ច អានាបានំ, ទ្វន្ទសមាសោយំ, សរា សរេ លោបំ, បរសរស្ស ទីឃត្តំ. អបរោ នយោ– អានញ្ច បានញ្ច អានាបានំ, អានន្តិ ឯត្ថ អា អនន្តិ បទច្ឆេទោ, អាការោ ចេត្ថ អន្តោត្ថោ. បានន្តិ ឯត្ថ ប អនន្តិ បទច្ឆេទោ, បការោ ចេត្ថ ពហិអត្ថោ. អានាបានន្តិ វត្តព្វេ ក្វចាទិមជ្ឈុត្តរានន្តិ- អាទិនា មជ្ឈេ ទីឃំ កត្វា អានាបានន្តិ វុត្តំ. វិនយដ្ឋ- កថានយេន អយំ វចនត្ថោ :- អនន្តិ ជីវន្តិ សត្តា ឯតេនាតិ អានំ, គមនវាតោ. អន្តោ ឧដ្ឋិតំ អានំ អានំ, ពហិនិក្ខមនវាតោ. ពហិ ឧដ្ឋិតំ អានំ បានំ, អន្តោបវិសនវាតោតិ. សុត្តន្តដ្ឋកថា- នយេន បន អយំ វចនត្ថោ :- ពហិ ឧដ្ឋហិត្វាបិ អន្តោ បវិដ្ឋំ អានំ អានំ, អន្តោបវិសនវាតោ. អន្តោ ឧដ្ឋហិត្វាបិ ពហិ និក្ខន្តំ អានំ បានំ, ពហិនិក្ខមនវាតោតិ. សុខុច្ចារណត្ថំ ទីឃំ កត្វា អានាបានន្តិ វុត្តំ. អស្សាសបស្សាសាតិ ឯត្ថាបិ ឯសេវ នយោ. សសន្តិ ជីវន្តិ សត្តា ឯតេនាតិ សាសោ. អន្តោ ឧដ្ឋិតោ សាសោ អស្សាសោ, សំយោគេ បរេ រស្សត្តំ, ពហិនិក្ខមនវាតោ. ពហិ ឧដ្ឋហិត្វាបិ វា អន្តោ បវិដ្ឋោ សាសោ អស្សាសោ, អន្តោ- បវិសនវាតោ. ពហិ ឧដ្ឋិតោ សាសោ បស្សាសោ, អន្តោបវិសនវាតោ. អន្តោ ឧដ្ឋហិត្វាបិ វា ពហិ និក្ខន្តោ សាសោ បស្សាសោ, ពហិនិក្ខមនវាតោ. សទ្ទនីតិធាតុមាលាយំ វិសេសោ ឦសកំ ភវតិ, កថំ, ឯតេសុ ទ្វីសុ នយេសុ វិនយនយេន អន្តោ ឧដ្ឋិតសសនំ អស្សាសោ, ពហិ ឧដ្ឋិតសសនំ បស្សាសោ. ឧប្បដិបាដិយា អាគតេន សុត្តន្ត- នយេន បន ពហិ ឧដ្ឋហិត្វាបិ អន្តោ សសនតោ អស្សាសោ. អន្តោ ឧដ្ឋហិត្វាបិ ពហិ សសនតោ បស្សាសោ. អយមេវ ច នយោ ‘អស្សាសាទិមជ្ឈបរិយោសានំ សតិយា អនុគច្ឆតោ អជ្ឈត្តំ វិក្ខេបគតេន ចិត្តេន កាយោបិ ចិត្តម្បិ សារទ្ធា ច ហោន្តិ ឥញ្ជិតា ច ផន្ទិតា ចាតិ, ‘បស្សាសាទិមជ្ឈបរិយោសានំ សតិយា អនុគច្ឆតោ ពហិទ្ធា វិក្ខេបគតេន ចិត្តេន កាយោបិ ចិត្តម្បិ សារទ្ធា ច ហោន្តិ ឥញ្ជិតា ច ផន្ទិតា ចាតិ ឥមាយ បាឡិយា សមេតីតិ វេទិតព្វំ.