អាភស្សរ

ចូឡធាតុបច្ចយជោតិកា

អាភា សរតិ ឥតោ ចិតោ ច តេសន្តិ អាភស្សរា, អាភាសទ្ទូបបទ - សរ គតិយំ, អ, ទ្វិត្តំ, រស្សោ. អា ភុសោ ភស្សោ និស្សដោ កប្បវិនាសកអគ្គិ ឯតស្មាតិ វា អាភស្សរោ. អា ភុសោ ភាតិ ទិប្បតីតិ អាភា, បភា. សរតិ និស្សរតីតិ សរា. អាភា សរា ឯតេសន្តិ អាភស្សរា. អភិធម្មត្ថវិភាវិនិយំ វលាហកតោ វិជ្ជុ វិយ ឥតោ ចិតោ ច អាភា សរតិ និស្សរតិ ឯតេសំ សប្បីតិកជ្ឈាននិព្វត្តក្ខន្ធ- សន្តានត្តាតិ អាភស្សរា. ទណ្ឌទីបិកាយ វា អច្ចិ វិយ ឯតេសំ សរីរតោ អាភា ឆិជ្ជិត្វា ឆិជ្ជិត្វា បតន្តី វិយ សរតិ និស្សរតីតិ អាភស្សរា. យថាវុត្តាយ វា បភាយ អាភាសនសីលាតិ អាភស្សរាតិ វុត្តំ. មណិសារមញ្ជូសាយំ អាភាសរាតិ ច វត្តព្វេ សការស្ស ទ្វិត្តំ, សំយោគេ បរេ អាការស្ស ច រស្សត្តំ កត្វា ឯវំ វុត្តន្តិ ទដ្ឋព្វំ. យថាវុត្តាយ បភាយាតិ ទ្វីសុ វិកប្បេសុ វុត្តប្បការាយ ឆិន្នាច្ឆិន្នាយ អាភាយំ. អាភាសនសីលាតិ ឱភាសនប្បកតិកា. ឯតេន អាភាសនំ ឱភាសនំ ឱភាសោ, សការស្ស ទ្វិត្តំ អាការស្ស ច រស្សត្តំ កត្វា អាភស្សោតិ វុត្តំ. សោ សីលំ ឯតេសន្តិ ឥមស្មិំ តស្សីលត្ថេ របច្ចយោតិ តទ្ធិតន្តោ អាភស្សរសទ្ទោតិ ទស្សេតីតិ វុត្តំ. អភិធម្មត្ថវិភាវិនិយា បន អត្ថយោជនា អាភាយនសីលាតិ អាភស្សរា, អាបុព្វោ ភា ទិត្តិម្ហិ, វជាទីហិ បព្វជ្ជាទយោ និបច្ចន្តេតិ តស្សីលត្ថេ សរបច្ចយោ, បរទេ្វតិអាទិនា សស្ស ទ្វិត្តំ, រស្សន្តិ មជ្ឈេ រស្សោ. កេសុចិ បោដ្ឋកេសុ អាភាសនសីលាតិបិ អត្ថិ. សោយេវត្ថោ. ភាស ទិត្តិម្ហិ វជាទិនា អរបច្ចយោតិ វុត្តំ.