អាមេឌិត

ចូឡធាតុបច្ចយជោតិកា

អាមេឌនំ បុនប្បុនមុច្ចារណំ អាមេឌិតំ អាមេណ្ឌិតំ វា, ទ្វត្តិក្ខត្តុមុទីរណំ. អាមេឌីយតិ វា បុនប្បុនំ ឧច្ចារីយតីតិ អាមេឌិតំ, អាបុព្វ - មេឌ មេឌិ វា ឧច្ចារណេ, តោ ឥការាគមោ. អា បុនប្បុនំ ភយាទិបីឡិតត្តា មេឌេន ឧម្មាទេន ឥតំ កថិតំ អាមេឌិតំ. តស្មា ចោរោ ចោរោ, សប្បោ សប្បោ ឥច្ចាទីសុ ភយេ, វិជ្ឈ វិជ្ឈ, បហរ បហរាតិអាទីសុ កោធេ, សាធុ សាធូតិអាទីសុ បសំសាយ, គច្ឆ គច្ឆ, លុនាហិ លុនាហីតិអាទីសុ តុរិតេ, អាគច្ឆ អាគច្ឆាតិអាទីសុ កោតូហលេ, ពុទ្ធោ ពុទ្ធោតិ ចិន្តយន្តោតិអាទីសុ អច្ឆរេ, អភិក្កមថាយស្មន្តោ អភិក្កមថាយស្មន្តោតិអាទីសុ ហាសេ, កហំ ឯកបុត្តក, កហំ ឯកបុត្តកាតិអាទីសុ សោកេ, អហោ សុខំ, អហោ សុខន្តិអាទីសុ បសាទេតិ ឯតេសុ នវសុ អាមេឌិតវចនំ បណ្ឌិតោ យោជេយ្យ. វុត្តា ហិ សង្គហគាថា អភិធានប្បទីបិកាយំ ភយេ កោធេ បសំសាយំ, តុរិតេ កោតូហលច្ឆរេ ហាសេ សោកេ បសាទេ ច, ករេ អាមេឌិតំ ពុធោតិ. ឯត្ថ ចសទ្ទោ អវុត្តសមុច្ចយត្ថោ, តេន គរហាសម្មានាទីនំ សង្គហោ ទដ្ឋព្វោ.